“Rrugëtimi i identiteteve fetare dhe influenca e tyre në shoqërinë shqiptare” :: DERVINA.COM

Arkivi i lajmeve
Për vitet 2006,2007 dhe 2008

^ Kategoritë

Kërko në lajme:

Shpalos kategorinë:

•	Lajmet kryesore

•	Lajmet në gjuhen angleze

•

Opinion

•	Intervista

•

Sport

•

Kultura

•

Histori

•

Diaspora

•

Tech-Info

Madhësia e shkronjave

Dukja	Madhësia (piksel)
AaBbCc	11 piksel
AaBbCc	12 piksel
AaBbCc	13 piksel
AaBbCc	14 piksel

Vizitorët online në arkiv: vizitorë

» “Rrugëtimi i identiteteve fetare dhe influenca e tyre në shoqërinë shqiptare”

Postuar më datën: 2008-04-18 19:00:21 nga admin4 :: Kategoria: Histori

» Opcionet për artikullin

	Bëj favorit këtë artikull
	Pritoje këtë artikull
	Dërgo tek shoku/shoqja
	Shto koment këtë artikull

Shkruan: Dorian Koçi
Universiteti Veror
Vlorë, 5.11.2007

I
Në fillim të vitit 2006, ambasada e Shteteve të Bashkura të Amerikës, dhuroi një fond përreth 30.000 euro për të restauruar një objekt brenda kështjellës së Rozafës që kishte shërbyer për një kohë të gjatë si kishë dhe xhami njëkohësisht.Në fakt, objekti me historinë e tij të veçantë mund të konsiderohet si një nga objektet sintezë të historisë religjioze së shqiptarve.E njohur dhe e dokumentuar si kisha e Shën Stefanit në veprat e Marin Barletit dhe Marin Beçikemit,dy autorëve të shekullit të XV, kisha do të shndrrohej në një xhami gjatë pushtimit turk.Sipas specialistëve mendohet se ″minareja është shtuar rreth vitit 1405“(Peçi.A,2006:1)dhe jo në vitin 1479 siç mendohet rëndom duke marrë për bazë pushtimin e kështjellës nga turqit. Viti 1405 është vit ″kur osmanët e patën në duart e tyre qytetin e Shkodrës për disa vjet së bashku me Ulqinin dhe Lezhën. Vendosja e garnizonit osman në këtë periudhë dhe stili i minareve selxhuke bashkëkohëse me minaren e kuqe në kalanë e Beratit të vitit 1389, si dhe vendosja e saj në anën fundore të xhamisë dhe jo në të djathtë hyrjes,është karakteristikë për xhamitë osmane të shekullit XV“(Po aty, 2006).
Adoptimi i bërë nuk kërkoi ndryshime të mëdha në arkitekturë, kjo për faktin se “orientimi i mihrabit koincidonte, me atë të mjedisit të altarit në apsidë. Ky mjedis ka qenë i mbuluar deri vonë me kupolë nervaturash të kryqëzuara të stilit romano-gotik. Në vitin 1660-1664 Veziri i Shkodrës, Mehmet Pashë Bushatlliu, në punimet rindërtuese e restauruese në strukturat e kalasë kreu ndërhyrje edhe në xhami duke shtuar hajatin me arkadë në anën jugore. Ai porositi nga Venediku edhe një mekanizëm sahati akustik, për të cilin siç shprehet vetë në një dokument kishte ngritur para xhamisë një kullë të lartë”(Po aty, 2006).Si mund të vështrohet me gjithë shndërrimet që iu bënë objektit, ″banorët e këtij qyteti e ruajtën harmoninë fetare”(Po aty,2006). Shkresa e firmosur nga Veziri i Shkodrës, ku rinovohej e leja zyrtare për të mbajtur meshën çdo të premte në mëngjes, tregon se banorët ende të përqendruar në kala, kishin mirëkuptimin maksimal mes tyre″(Po aty, 2006).Por ajo që ishte shmangur për një kohë të gjatë me mirëkuptim midis dy komuniteteve fetare u lëkund në ditët e sotme kur godina nuk shërbente më si një objekt kulti.
Qysh pej vitit 1878, kur ajo u kthye në një depo baruti,godina gjendet në gjendjen e sotme duke pritur një restaurim të mundshëm që sipas specialistëve duhet të përfshijë të gjitha etapat e ndërtimit të saj.Por jo të gjithë ndanin të njëjtin mendim në qytetin verior të Shkodrës.Një debat shpërtheu midis Komunitetit Musliman të Shkodrës dhe Kishës Katolike,për përkatësinë e objektit dhe nëse ajo duhej restauruar në një kishë apo në një xhami.Si gjithmonë në raste të tilla lindën pyetje të ndryshme të cilat nxorën në pah sërish konflikte të heshtura nën petkun e fortë të formimit të shtetit-komb të periudhës së viteve 20’ dhe totalitarizmit të viteve 40’-90’ që qenë munduar ti fashisnin konflikte të tilla në emër të formimit të identitetit dhe kombit shqiptar.
Më tepër se një konflikt mbi pronësinë e një objekti, situata hodhi dritë mbi identitetet e fjetura fetarë të shqiptarve dhe në këtë mënyrë mund të thuash se ishte një pararendëse e debatit Kadare-Qose që mbërtheu elitën intelektuale shqiptare pas nënshkrimit të marëveshjes së MSA dhe publikimit të veprës së Kadaresë “Identiteti Evropian i Shqiptarëve”.
Në këtë studim do të mundohemi të hedhim dritë nëpërmjet një analize të hapave të parë të formimit të shtetit modern të shqiptarve sesa përcaktues ka qënë identiteti fetar në zgjimin nacionalist të shqiptarve, si ka ndikuar dhe ndikon ky identitet në shoqërinë shqiptare dhe prirjet moderniste të religjionit të shqiptarëve në epokën e sotme të Globalizmit.

II
Identiteti fetar në Shqipëri nuk është marrë gjithmonë në konsideratë në rrugëtimin e tij drejt realitetit që kemi sot, duke vlerësuar se motoja e rilindasit Pashko Vasa “ Feja e shqiptarit është shqiptaria” është përgjithsuese dhe karakteristike për epokën e Rilindjes Kombëtare të shqiptarve dhe si e tillë duhet ti përshtatet apriori të gjitha situatave shtetformuese apo kulturoro-historike të mëvonshme.Ky përcaktim vjen pasi Rilindja Kombëtare ka një peshë të veçantë në botëkuptimin nacionalist shqiptar si apogjeu i përpjekjeve intelektuale dhe shpirtërore për të themeluar një Shqipëri moderne dhe të zhvilluar. Në fakt rrugëtimi identitetit fetar të shqiptarve i ka përngjarë një batice e zbatice,pa qenë asnjëherë në gjendje të luajë fuqinë e një force centrifugale për të realizuar një bashkim të qëndrueshëm kombëtar,as shumë i fuqishëm sa të pengojë përjetsisht atë, por i mjaftushëm sa të influencojë dhe vonojë disa procese intriguese që popujt e tjerë të Ballkanit i realizuan më shpejt se shqiptarët.
Gjithsesi shprehja nuk duhet marrë si simboli i një lëvizje apo epoke , siç ka prirje të shumta në qarqe studiusish apo politikanësh për ta përqasur atë, pasi në një analizë të thellë të veprës së dy poetëve tanë kombëtarë që kanë luajtur dhe një rol të madh në formimin e ndërgjegjies kombëtare vëren se identiteti fetar është një pjesë e rëndësishme e veprës së tyre.Kështu p.sh është e pamundur ta lexosh Gjergj Fishtën dhe të mos hasësh binomin “Fe dhe Atdhe”, ku me fe ai nënkupton fenë e të parve- Katolicizmin apo Naim Frashërin dhe të mos hasësh Bektashizmin dhe filozofinë e panteizmit të tij.Madje Naimi shkon dhe më larg në botkuptimin e tij fetar kur krijon një poemë si “Qerbelaja”që përshkruan një konflikt të mirëfilltë fetar.
Shqiptarët nuk mund të bënin dallim nga popujt e tjerë ballkanikë kur nisën zgjimin e tyre nacionalist.Prirja e natyrshme do të ishte ashtu si dhe te fqinjët e vet,një kundërvënie ndaj fesë zyrtare të pushtuesve-Islamit,diçka që hasi në vështirësi që në hapat e parë sepse një pjesë e konsiderueshme e shqiptarve kishin pranuar Islamin dhe nën influencen e shtetit teokratik osman e identifikonin veten shpesh herë si myslimanë dhe pastaj si shqiptarë.

“Kultura islamike e Perandorisë Osmane i kishte mëshuar identifikimit të besimit fetar me kombin,duke sheshuar dallimin midis shqiptarve e myslimanëve të tjerë nga njëra anë,dhe duke nxjerrë më në pah, nga ana tjetër, atë midis islamikve dhe krishterësh gjithfarsojësh.Në një shoqëri shumëkombëshe, siç ishte ajo e Perandorisë Osmane, jeta e nënshtetasve të saj, ç’është e vërteta, ishte organizuar rreth besimit, të cilit, ata i përkisnin:domethënë, vija ndarëse ndërmjet të qeverisurve nga qeverisësit-ose, thënë më shkoqur, popullsisë hegjemone-ishte religjioni dhe jo kombësia, ku padyshim, ashtu si në të gjithë perandorinë, myslimanët përftonin një pozicion të priveligjuar, gjë që, në rastin e Shqipërisë qe shndrruar e kishte përbërë një pengesë objektive për të arritur bashkimin kombëtar të myslimanëve me të krishterët,qofshin ata ortodoksë apo katolikë.”(Salleo 2000:22).
Edhe pse egsistonte nje farë “patriotizmi lokal “që shpesh herë gjente shprehje ashtu siç na dëshmon Hobhouse-i në veprën e vet A Journey through Albania and other provinces of Turkey in Europe and Asia, to Costantinople during the years 1809 and 1810 në deklarimet e banorve, që kur i pyesnin s’e ç’ishin,banori shqiptar nuk thoshte përkatësinë fetare por përgjigjej “Jam shqiptar”(Mema,1988:70), prapësëprapë ky patriotizëm lokal nuk shtrihej në përmasa përgjithsuese që mund të përbënte një nga bërthamat e themelimit të identitetit shqiptar dhe pastaj më vonë atë kombëtar.
Ishin lëvizjet e mëvonshme anti-osmane të viteve 20’,30’ e 40’ të shekullit të XIX në kuadër të luftës kundër centralizimit të perandorisë turke që krijuan kundërvëniet e e para serioze pas 3 shekujsh pushtimi.Rëndësia e këtyre kryengritjeve qëndron se shqiptarët myslimanë u ngritën në kryengritje kundër pushtetit turk që faktikisht duhej të konsiderohej si tyre.Është e vërtetë se ato nuk ishin lëvizje me karakter të plotë kombëtar por gjithsesi vërehet një ngjizje e identitetit kombëtar shqiptar kur rapsodi popullor i këndon përpjekjeve të kryengritësve që s’luftojnë “as për mua e s’për ti/po për gjithë Shqipëri”(Islami,1977:67).Në këtë kohë nis dhe procesi i gjatë para-rilindas i ngjizjes së idesë mbizotëruese se shqiptarët në rrugën e tyre drejt pavarësisë apo afirmimit të tyre si komb, duhet ta shmangnin faktorin fetar dhe të bënin të tyren dy faktorë të tjerë: gjuhën shqipe dhe figurën mitike të heroit të tyre kombëtar Gjergj Kastriot-Skënderbeut. Për të arritur këtu mendimi politik i rilindasve tanë përsa i përket identitetit kombëtar kaloi në tre etapa maturie,të cilat dëshmojnë dhe rrugëtimin e identitetit fetar të shqiptarve. “Ndërmjet fqinjëve ballkanikë të Shqipërisë feja dhe kombësia përputheshin.Përderisa kjo nuk ndodhte me shqiptarët,udhëheqësit e tyre u përpoqën të zhvillonin ato aspekte të kulturës kombëtare që ishin të një natyre jofetare sepse vetëm kështu mund të arrihej bashkimi”(Skëndi,2000:111)
Etapa e parë i përket periudhës 20-60 të shekullit XIX, kohë në të cilën përkthehen Bibla nga gjuha greke në atë shqipe, duke krijuar kështu një sfond të nevojshëm shpirtëror për shqiptarët e besimit ortodoks që gjuhën e tyre tashmë mund ta shikonin dhe si “gjuhë perëndie”, ku mund të lexonin dhe kuptonin shkrimet e shenjta.Kjo epokë lidhet fort dhe me krijimin e komuniteteve të forta tregtare në jug të vendit, tashmë fshatra por dikur të lulëzuara si Voskopoja ,Vithkuqi etj apo rritjen e qyteteve si Elbasani, Gjirokastra, Shkodra e Berati.Nga rradhët e këtyre komuniteteve do të dilnin dhe disa nga figurat e shquara të mendimit politik rilindas shqipar si Vangjel Meksi që përkthen Biblën në shqip, Naum Veqilharxhi që krijon abetaren e parë në shqip, Kostandin Kristoforidhi që përkthen e boton Biblën në shqip etj figura, vepra e të cilëve do influenconte në zgjimin nacionalist shqiptar.
Etapa e dytë i përket viteve 40’-70’ të të njëjtit shekull, kohë në të cilën fillojnë të dalin në pah manifestet e para të Rilindjes Kombëtare dhe nën influencën e Romantizmit Evropian dhe përmbledhjet e para folklorike.Interesant është fakti se në këto manifeste ndihet një pranim i situatës religjioze në Shqipëri dhe bëhet përjekje që të mos cënohen marrëdhëniet midis komuniteteve fetare,por gjithsesi ka akuza të tërthorta për situatën e keqe në të cilën gjendet Shqipëria dhe një nga ato sipas “Letrës Encilike Për Të Gjithë Të Pasurit E Të Mësuarit Ortodoksë Shqiptarë” të Naum Veqilharxhit është dhe “hyrje dogmash të reja fetare”(kupto Islamin)(Islami.M,1977:147).
Po kështu përjashtues mbetet fakti që encilika u drejtohet vetëm “të pasurit e të mësuarit ortodoksë shqiptare”(po aty:147),duke mos përmendur të pasurit e të mësuarit myslimanë një pjesë e të cilëve ishin dhe elitë e Perandorisë turke apo të pasurit e të mësuarit katolikë,të cilët kishin një komunitet të fuqishëm tregtar në Shkodër.
Encilika në këtë mënyrë, sa shpreh një vullnet nacionalist kur flet për përparimin dhe dëshirën për tu vënë “në rradhën e kombeve të qytetëruara”(po aty:149), po aq ka dhe një karakter lokalist e përfaqësuar nëpërmjet titullit të vet.Në këtë etapë vërehet se identiteti fetar vazhdon të jetë një pjesë e rëndësishme e përpjekjes për të formuar identitetin kombëtar.
Efekti i këtij karakteristike lokaliste të Encilikës u mundua që të shmangej në epokën e tretë që i përket viteve 1878-1912, vite të stuhishme këto për themelimin e shtetit dhe identitetit shqiptar.Në fakt lëvizja shqiptare kishte humbur mbështetës që në fillimet e para të tyre kishin përkrahur idenë e shqiptarizmës por nën influencën e prosiletizmit që filloi Patriakana Greke e Stambollit jo vetëm ndaj zgjimit nacionalist shqiptar por dhe atij të kombeve të tjerë në ballkan, kaluan në përkrahës të hapur të Helenizmit.
Sigurisht, përkatësia fetare kish qenë një faktor kryesor që i kish kthyer si me “magji” këta figura në identitete të defermuara “greke” sipas kulturës që i përkisnin por që shumë shpejt përqafuan dhe deklaruan dhe identitetin e tyre si “grekë”. Një rast tipik është shqiptari i pasur nga Labova Vangjel Zhapa ,i cili nga një përkrahës i një “lëvizje për kulturë kombëtare”(kupto shqiptare)(po aty:120) në vitin 1844, kthehet në një përkrahës të Helenizmit në vitin 1860 kur polemizon me Naum Veqilharxhin “kundër alfabetit shqiptar”(po aty:84).
Për të tejkaluar këtë pengesë të rrezikshme që mund të shkaktonte dështimin e projektit nacionalist shqiptar, rilindasit i kushtuan më shumë rëndësi bashkimit sesa identiteve të veçanta fetare.Në asnjë prememorie apo program të saj nuk do të gjendet më ndonjë thirrje e njëanshme si e Veqilharxhit,bazuar në identitetet fetare.Madje dhe kur do të ketë propozime gjithpërfshirës si ai i De Radës për një Shqipëri të ardhme federative, “të ndarë në tre njësi, në bazë të besimeve fetare”(Skëndi,2000:159), mendimtari politik i Rilindjes Sami Frashëri do ta kundërshtonte si plan “jo të mirë dhe as të realizueshëm”(Po aty:159). Në vend të njësive të bazuara mbi identitetet e veçanta fetare ,të cilat sipas Sami Frashërit do të sillnin ndarje, ai propozonte se “fetë duhet t’i liheshin kishës dhe xhamisë dhe se gjithë shqiptarët duhej të bëheshin vëllezër ashtu siç e kishte caktuar vetë natyra dhe siç kishin qenë në kohët e lashta”(po aty:160). Të njëjtin mendim ndante dhe Naim Frashëri i cili shprehej në librin e vet “Liga e vërtetë e Shqiptarve” se “ne të gjithë kemi fe Perëndinë dhe nënë Shqipërinë.Kushdo le t’i falet Perëndisë si të dojë.Po kjo nuk bën të na ndajë” (po aty:159). Është po Naim Frashëri që në 1898, në prag të vdekjes së tij boton “Istori e Skënderbeut”,një lloj testamenti politik me të cilin poeti kombëtar i shqiptarve dëshironte t’u jepte kumte të reja bashkëatdhetarve të vetë.Në poemë mungojnë referencat fetare,por ka një idealizim të fortë të gjëndjes së Shqipërisë të para pushtimit turk.
Në poemë nuk përmendet asnjë institucion fetar apo lidhjet e Skënderbeut me Papët e Romës e aq më tepër cilësimin prej tyre si “Kampion i Krishtërimit”, por ka një “pamje idilike”(Sulstarova, 2007:6), ku si karakteristika të kohës jepen paqa, kama ,nderi, shpresa , drejtësia ,dashuria , miqësia dhe besa-besa.Nuk është e vështirë të kuptohet se duke mos përmendur asnjë fe konkretisht, por duke dhënë në të njëjtën kohë pothuajse të gjitha karekteristikat e besimeve monotheiste, Naimi Frashëri dëshiron të “krijojë” një besim të përbashkët të gjithë shqiptarve,të cilin ai e gjen të konkretizuar në epokën e Skënderbeut.Kjo “fe” e re që Naimi kërkon të krijojë nuk është gjë tjeter veçse bashkimi kombëtar i shqiptarve dhe atdhedashuria.Zgjedhja e figurës së Skënderbeut si simbol i bashkimit kombëtar nuk është e rastësishme, por nëpërmjët figurës së tij rilindasit kërkonin të nënvizonin faktin e kundërvënies dhe luftës me turqit për të arritur pavarësinë,simbol të të cilave janë bërë vargjet e Naim Frashërit :

Jo nuk vdiq Shqipëria
Nuk vdiq por është gjallë
Tjatër përgjigjie Turqia
Nuk do përveç me pallë
(Frashwri,1966:63)

Për të shmangur kontradiktat fetare midis shqiptarve,një pjesë e konsiderueshme e të cilëve kishin përqafuar Islamin dhe që ndoshta akoma e shihnin Turqinë si pjesë përbërëse të atdheut të vetë, antagonizmi turko-shqiptar në poemë përshkruhet më shumë si “përplasje qytetërimesh” midis Evropës dhe Azisë sesa dhe kundërvenie fetare siç shihet në letersinë apo programet politike të kombeve të tjerë ballkanikë.Këtij qëndrimi që ravijëzohet dalë nga dalë në mendimin politik shqiptar do ti qëndrojnë besnik jo vetëm Naim Frashëri që i përkiste vet besimit mysliman por dhe shkrimtarë dhe ideologë të tjere të krishterë të Rilindjes kombëtare.
Është shumë e rëndësishme të kuptohet se kjo zgjedhje e rilindasve ka qenë më tepër e detyruar sesa ka në të një përçmim apo kundërvënie ndaj Azisë-Lindjes.Vetë Naimi Frashëri ishte një orientalist i shkëlqyer i cili madje kish botuar dhe një përmbledhje poetike në persisht.Natyrisht ishte e natyrshme që intelektualët shqiptarë të kishin filluar të kishin një tërheqje ndaj zhvillimit kulturor dhe ekonomik të Evropës,fenomen që nuk ndodhte vetëm në ndër shqiptarë që ishin afër Evropës gjeografikisht,por dhe që në momente të ndryshme kishin marrë pjesë aktivë në disa nga proceset evropiane,por dhe vetë ndërmjet elitës turke.Shekulli i XIX ishte një shekull i shdrrimeve të mëdha,dhe modernizmi ishte prirja e ditës.
Identiteti fetar kish luajtur një rol të fuqishëm dhe frenues në ngjarjet e Lidhjes shqiptare të Prizrenit,ku nuk u arrit të avancohej apo shkohej më tej në kërkesat ndaj Portës së Lartë sepse “forcat që sundonin në mbledhjen e Prizrenit ishin forca myslimane konservatore dhe nëpërmjet tyre Porta mund të ushtronte një ndikim për interesat të veta.Kjo shpjegon përse shqiptarët e Prizrenit luftonin në fillim,bashkë me boshnjakët myslimanë për një kauzë të përbashkët.”(Skëndi,2000:46).Ky lloj dyzimi i elitës administrative shqiptare jo vetëm gjatë Lidhjes se Prizrenit por në vazhdimësi, për ti quajtur të vetat interesat e perandorisë, do të pengonte dhe vononte rrugëtimin e shqiptarve drejt pavarësisë.
Duke qenë se patriotizmi lokal , kishte një influencë jo të vogël në botëkuptimin e shqiptarve,për të cilët mund të qe “një gjë e natyrshme që të kridhesin në mbretërinë më të madhe(kupto Perandorinë Turke) e të linin pas dore atdheun e tyre të vogël dhe primitiv,interesin e të cilit e shihnin të lidhur ngushtë me atë të perandorisë”(po aty:29),gjithsesi “në përgjegjësi nuk harronin se ishin shqiptarë”(po aty:29),faktorit të dytë që iu mëshua për të shmangur dallimet,ishte gjuha kombëtare.
Në asnjë komb tjetër nuk gjen një numër kaq të madh poetësh dhe mendimtarësh që ti kenë kenduar apo thurrur himne gjuhës sa në letërsinë shqiptare të shekullit XIX-XX. “Gjuhë perëndie”(po aty:120)e quan Naim Frashëri, ai që nuk flet shqip sipas Fishtës, “duket i ulët...Krejt i turpëruar?si ai që.... nuk di se kush është babai i tij”(po aty :121).Rëndësinë e gjuhës dhe lëvrimit të saj e jep Kristoforidhi kur shprehet se”nëse gjuha shqipe nuk do të shkruhet,atëherë brenda një kohe të shkurtër nuk do të ketë më Shqipëri në faqe të dheut dhe as do lexohet më emri shqiptar në hartën e botës”(po aty;119).
Eshtë ky afiksacion me figurën e Skënderbeut, gjuhën dhe kulturën kombëtare që formon shtratin e identitetit kombëtar të shqiptarve,u jep atyre kohezionin që u mungon nga dallimet fetare dhe i përgatit për maturinë e tyre si komb.Në brezin e dytë të Rilindasve gjejmë vargjet monumentale të Andon Zako Çajupit që shpërthen në “Myslimanë’ e të krishterë/jemi keq/Të ngrihemi të tërë/djem e pleq”(po aty:121).Përballë këtyre dy faktorve, identitetet fetare të nxitura më shumë nga turqit përsa i përket popullsisë myslimane dhe Patriakanës së Stambollit dhe shtetit grek përsa i përket popullsisë ortodokse fillojnë e humbin terren,neutralizohen por jo deri sa të zhduken fare.Nuk mungojnë edhe rrugët e tjera të tërthorta të cilat duke e ditur rëndësinë e identitetit fetar kërkojnë të ndërmarrin hapa të rëndësishëm për bashkimin e shqiptarve duke nxitur përqafimin e një feje të vetme apo konvertimin në një tjetër perëndimore siç ishte protestanizmi.Është i ditur fakti se në këtë rast Naim Frashëri preferonte dhe propozonte bektashizmin si sekti islam që ishte dhe më afër kristianizmit.Një propozim tjetër erdhi nga rradha e intelektualve patriotë ortodoksë,të cilët vuanin faktin se përveç që shqipja ndalohej nga autoritetet turke ata nuk mund ta praktikonin gjatë liturgjisë fetare sepse ndalohej nga autoritetet kishtare greke.Ata u ndodhën përpara një dileme, “nëse duhej të përqafonin një degë tjetër të kristianizmit që kështu të hiqnin qafe ndikimin grek dhe të fitonin proteksionin e fuqive dhe popujve të perëndimit?”(po aty:169).Për këtë dilemë pati dy versione,gazeta Kombi e Bostonit propozoi “kthimin e shqiptarve në ortodoksë unikë,do me thënë të ruhej liturgjia ortodokse por të njihej Papa si udhëheqës suprem shpirtëror”(po aty:169),një rast i tillë ishte popullsia e Shpatit në Elbasan, kurse shoqëria shqiptare e Egjiptit mbështeste “konvertimin në protestanizëm,e cila jo vetëm kishte pasues të fortë në perëndim por gjithashtu,duke qenë gjë e re në Shqipëri,mund të tërhiqte pasues nga të tre fetë.”(po aty:169)Siç kuptohet dhe nga pyetjet dhe dilemat e ngritura identitetet e veçanta fetare kanë qenë një pengesë serioze për lëvizjen kombëtare shqiptare dhe klasa intelektuale shqiptare ishte gati të bënte dhe kompromise të këtij lloji,të cilat natyrisht nuk dihet nëse do të priteshin mirë apo përqafoheshin nga populli i thjeshtë.Në fakt shqiptarët,nuk ishin të përgatitur për veprime të tilla, pasi ata nuk ishin aq të pjekur politikisht sa të ndërmerrnin një hap të tillë,ndaj në lëvizjen kombëtare shqiptare zuri vend më shumë propozimi i Fan Nolit,i cili nuk e shikonte problemin në egzistencën e tre feve, por në faktin që “asnjëra nga besimet e njohura në Shqipëri nuk praktikohej në gjuhën shqipe,dhe klerikët qenë armiq me njëri-tjetrin”(po aty:169).Më andej Noli shtonte se “fatkeqësia nuk qëndron aq shumë në ndryshimin e feve sesa në krerët fetarë.Ata nuk duhen të jenë të huaj,por shqiptarë dhe patriotë”(po aty:169).Këtu zë fill projekti i Nolit i cili themeloi Kishën Autoqefale Ortodokse shqiptare,duke e shkëputur nga ndikimi grek dhe u duke u dhënë një shembull të mirë edhe shqiptarve të besimeve të tjera sesi mund të fitonin pavarësinë shpirtërore dhe forcimin e vetdijes së tyre kombëtare.
Kështu identitetet fetare fillojnë të përftojnë ngjyrat shqiptare,por gjithsesi kjo rrugë ishte ende e brishtë për të dhënë rezultat menjëhere.
Në prag të shpalljes së pavarësisë,atëherë kur fillon e kuptohet se bërja e Shqipërisë si shtet i pavarur është shumë afër dhe e pashmangshme, identiteti fetar rigjallërohet sërish për të dalë në skenë herë në trajta të verbërta në formën e kryengritjeve dhe herë denoncues për lirinë e munguar përgjatë pushtimit të gjatë turk.Influenca e tij përgjatë viteve të para të pavarësisë dhe formimit të shtetit modern të shqiptarve do të jetë jo e papërfillshme dhe madje në disa raste përcaktues.
Madje ai është prezent dhe në programin prej 14 pikash më 9 gusht 1912 që kryengritësit shqiptarë kërkuan të realizohej nga qeveria turke për të fituar autonominë, ku në një nga pikat krahas krijimet të liceve me bazë gjuhën shqipe, kërkohej dhe “ krijimi i medreseve (shkolla me mësim fetar mysliman) dhe ruajtja e adeteve dhe zakoneve të Islamit”(po aty:389).Prania e këtyre pikave në programin autonomist shqiptar tregonte se identiteti fetar përbënte gjithashtu një pjesë të rëndësishme të vetdijes së shqiptare,i cili nuk mund të mos merrej parasysh.Shqipëria hynte në rradhën e kombeve të rinj të kontinentit,si kombi me katër besime fetare si askush tjetër më parë.

III
Egzistenca e shtetit shqiptar të vitit 13’ e në vazhdim do përbente një kuriozitet të veçantë sociologjik pwr tw gjithw ata qw do ta ndiqnin nga afwr, pasi kërkohej të kryhej pothuajse e pamundura, të ngrihej dhe mbijetonte një shtet me fqinjë agresivë që nuk dëshironin që ta njihnin pasi tokat shqiptare i konsideronin si plaçka të luftës ballkanike që kishin fituar, me rezerva financiare të pamjaftueshme as për të paguar rrogat e nëpunsve të vet dhe me një popullsi që ishte në mes të formimit të identitetit kombëtar dhe e ndarë në katër besime fetare.Përsa i përket armiqësisë së fqinjve, kjo gjë nuk mund të ishte e pakëpërcyeshme pasi herët a vonë nën presionin e fuqive të mëdha Austro-Hungarisë dhe Italisë fqinjët do neutralizoheshin,po kështu gjendja financiare do të përmirësohej pasi Shqipëria zotëronte burime natyrore dhe me ndihmën e fuqive të mëdha të interesuara për të, do të dilte nga kriza.Problemi i vërtetë nuk do të qëndronte as në marrëdhëniet midis komuniteteve fetare pasi Shqipëria deri në atë kohë kish demostruar një tolerancë fetare deri diku të pranueshme, por në ndarjen e pushteteve në shtetin e ri, ku myslimanët kishin patur privilegjet tradicionale të pjesmarrjes në qeveri, kurse të krishterët katolikë në veri dhe ortodoksë në jug kishin qenë të përjashtuar.Kjo do të ishte sfida më e madhe në shtetin e ri, ku identitetet fetare do të kërkonin të rikonfiguroheshin në kërkim të afirmimit të tyre për të ndarë më vonë tortën e pushtetit.Logjika që mund të egsistonte ishte se përderisa shteti i ri u krijua nën kujdestarinë e Evropës,të krishterët shqiptarë do kishin më tepër pjesmarrje dhe se myslimanëve do u duhej të hiqnin dorë nga privilegjet tradicionale.
I pari që e kuptoi këtë ishte publicisti Faik Konica i cili në një artikull të vet qysh në prag të shpalljes së pavarësisë “ drejtuar vetëm myslimanve vinte në dukje se për ata po afrohej një rrezik iminent”(Skëndi,2000:359).Më tej Konica shtonte se “ishte i sigurtë se otomanët do të dëboheshin prej Evropës dhe shqiptarët myslimanë rrezikonin kështu të përziheshin dhe ata dhe vendi i tyre të ndahej”(po aty:359). Prandaj sipas Konicës “kishte vetëm dy zgjidhje për bashkëfetarët e tij:ose të ktheheshin në fenë e stërgjyshërve të tyre,domethenë të bëheshin të krishterë,ose të mbeteshin myslimanë, por të ishin aq të afërt dhe sinqerisht të bashkuar me të krishterët,sa ti jepnin kombit një karakter semi-kristian”(po aty:359) .Më andej Konica vazhdonte të këshillonte se “përderisa rikonversioni nuk mund të bëhej,shqiptarët mund ta mbanin fenë Islame, por në të njëjtën kohë të largoheshin nga e keqja politike që vinte prej saj:identifikimi nga të huajt i shqiptarit mysliman me turkun”(po aty:359-360).Ndoshta Konica egzagjeronte pakëz kur kërkonte që kombit ti jepej një “karakter semi-kristian”pasi ndoshta nuk ishte e nevojshme të shkohej deri në atë pikë dhe as vetë popullsia myslimane nuk ishte e gatshme për një gjë të tillë, por që ishte e nevojshme një ri-regullim i ri në raportet mes myslimanve dhe të krishterëve kjo patjeter që s’kishte diskutim.Për një kohë të gjatë dhuna feudale e identifikuar dhe shpesh herë si dhunë fetare ndaj të krishterëve në Shqipëri kish krijuar të çara të mëdha të cilat kërkoheshin të riparoheshin.Në formimin e qeverisë së parë shqiptare u morr parasysh identiteti fetar dhe ajo përfaqësonte të katër besimet.Caktimi i një princi evropian,një vit e gjysëm më vonë krijoi të çarat e para në besimin e ri të ndërsjelltë që po krijohej.
Një rol të rëndësishëm në acarimin e situatës luanin dhe fqinjët ballkanikë të Shqipërisë që kërkonin të destabilizonin shtetin e ri dhe xhonturqit që kërkonin të rikonfirmonin influencën e tyre nëpërmjet caktimit të një princi mysliman.Këta të fundit “duke shfrytëzuar në mënyrë të veçantë grupe fanatikësh myslimanë boshnjakë,që ishin vendosur në Shqipëri nën mbrojten e Portës,në kohën e pushtimit austriak të Bosnjë-Hercegovinës”(Salleo,2000:86) si dhe ndjenjat islamike të një pjese të popullsisë vendase “organizuan një kryengritje të vërtetë”(po aty:86) me tendenca islamike kundër qeverisë së Princ Vidit.Lëvizja ka hyrë në histori si “kryengritja e Haxhi Qamilit” dhe përfaqëson një nga episoded më të errta në historinë moderne të shqiptarve.Kërkesat kryesore të “kryengritësve” ishin që Shqipëria të futej nën suzerainite turk, përdorimi i flamurit turk dhe i turqishtes dhe ndonjëhere ato kalonin dhe cakun e absurditetit kur kërkonin që princ Vidi të kthehej në mysliman dhe të bëhej synet!Identiteti fetar shfaqej kështu në formën më të egër dhe primitive për të shkatërruar identitetin kombëtar që mezi kish filluar të merrte jetë.Në të njëjtën kohë por me një kahje tjetër përsa i përket identitetit fetar shpërthen dhe rebelimi i ashtëquajtuar “epiriot” në jug të Shqipërisë i organizuar nga një renegat shqiptar, Kristaq Zografo-ish ministër i jashtëm i Greqisë nga fshati Qestorat i Lunxhërisë dhe një nga “shpirtërat e humbur” të shqiptarve në betejën e tyre me Helenizmin dhe Kishën greke.Rebelimi u nxit dhe u mbështet nga ushtritë pushtuese greke të cilat kishin hyrë në territorin shqiptar, përkatësisht në Gjirokastër e Sarandë. “Bandat epiriote” të Zografos mundën të marrin pjesë si palë në bizedimet që Komisioni Ndërkombëtar ndërmori me autoritetet greke,bizedime nga të cilët u formulua dhe “Protokolli i Korfuzit”,që iu dërgua fuqive të mëdha për ta miratuar, miratim i cili erdhi në datën 2 Korrik.
“Dispozitat e protokollit ndërmjet të tjerash parashikonin shndrrimin e bandave të armatasura në xhandarmëri lokale,e cila do të ushtronte detyrat e saj vetëm në qarqet e Korçës e të Gjirokastrës.Në të dyja rrethet,qeveria shqiptare do të emëronte guvernatorë të krishterë,pranë të cilëve do të vendoseshin këshilltarë të zgjedhur nga vota e popullit.Sigurohej liria e plotë e besimit, ndërsa gjuha greke do të mësohej në shkollat fillore, si dhe do të përdorej në administratë dhe në sistemin e drejtësisë”(Salleo, 2000:78).
“Kjo xhandarmëri që përbehej nga vullnetarë që tashmë ishin nën armë”(po aty:78), përbën pikën më të errët të kësaj historie pasi anjëherë nuk është theksuar në historinë zyrtare të Shqipërisë se këta vullnetarë ishin banorë lokalë të krishterë të Shqipërisë së jugut, të cilët në emër të identitetit të tyre fetar braktisën identitetin e tyre etniko-gjuhësor si shqiptarë ,për të krijuar apo përqafuar një identitet tjetër kombëtar.
Arsyet mund të ishin nga më të mundshmet ,një pjesë të të cilave ende vazhdon fatkeqësisht dhe sot ndër shqiptarët emigrantë në Greqi, por që shoqëria shqiptare e asaj kohe i duhej të bënte një “mia culpa”, përsa i përket dhunës feudale që shpesh herë aristokracia shqiptare myslimane kish ushtruar mbi popullsitë krishtere shqiptare,ky duhej të ishte pa diskutim një nga hapat e parë që ajo duhej të ndërmerrte për të realizuar një bashkim të vërtetë kombëtar.
Qysh gjatë shtypit të Rilindjes kish patur një debat të gjerë mbi barazinë politike të shtetasve në shtetin e ardhshëm shqiptar, ku nuk kishin munguar dhe tonet e ashpra.Një nga më të ashprit ishte poeti Asdreni i cili në artikullin e vet “Dy fjalë për Aristokracinë” botuar në Albania theksonte se:

“Nëse Shqipëria ishte duke fituar pavarësinë e saj...ajo munded dhe të mos e fitonte këtë,në qoftë se të gjithë shqiptarët nuk kanë për të gëzuar të gjitha të drejtat e tyre; dhe nëse duam të ndjekim idetë e mëdha:barazi,vëllazëri,liri-atëherë ç’nevojë ka kombi të ndahet në shkallë,me zotërinj dhe skllevër?Shqiptarët duhet të jenë të barabartë midis ligjit.Titujt duhen të hiqen...Apo mos vallë besoni se aristokracia duhet të urdhërojë dhe atëherë siç bën tani?”(Skëndi,2000:175)

Ky paragraf shpesh herë është komentuar edhe si parim i luftë klasash nga historiografia komuniste por dhe nga historinë shqiptarë në perëndim(shih Skëndi Stavro,Zgjimi Kombëtar Shqiptar Tiranë,dhjetor 2000) por në të vërtetë pasqyron një realitet të hidhur që ishte mbizotërues në Shqipëri në atë kohë.Asdreni jetonte dhe punonte në Rumani e cila ishte një monarki, dhe asgjëkundi tjetër nuk gjenden shkrime që të jetë kundër aristokracisë në përgjithsi, por mendimi i tij i drejtohej pikërisht kundër arbriritetit me të cilin qeveriste aristokracia shqiptare në atë kohë.Është shumë i rëndësishëm të kuptohet fillimi i këtij debati sepse në vitet 20’ ai do të marrë përmasa më të mëdha dhe kontestuesit e klasës feudale nuk do të nisen nga premisa thjesht anti-lindore kur do ta cilësojnë aristokracinë feudale si “anadollake”(Sulstarova 2007:7), por me këtë term do të identifikonin burimin e privilegjeve që ata kishin fituar gjatë pushtimit turk.Në biografinë zyrtare të Mustafa Qemalit,dhe shpesh herë dhe ai vet mburrej se nga nëna kish origjinë nga viset e Anadollit,të cilat konsideroheshin si viset ku u themelua shteti i osmanëve.Identifikimi shpesh herë me lavdinë perandorake të familjeve aristokrate shqiptare vazhdonte dhe pas pavarësisë dhe hapësira e shtetit të ri që u krijua nuk i mjaftonte asaj për të demonstruar ambiciet e veta për karrierë prandaj dhe vetë midis saj pati një konflikt të fortë për pushtet.
Përfaqësuesi tipik i saj ishte Esat Pashë Toptani ,i cili në një intervistë të dhënë në një gazetë italiane në vitin 1914 kur fliste për ardhjen e princ Vidit në Shqipëri,“nuk i mohonte simpatitë e tij për Turqinë”(Salleo,2000:61),por në të njëjtën kohë i zotohej princit se “askush tjetër përveç tij nuk do të bëhej mbret i Shqipërisë në qoftëse princi jepte dorëheqjen”(po aty:62),duke shprehur në këtë mënyrë ambiciet e tij personale.
Lufta e parë botërore i fashiti për një moment konfliktet e brendshme të bazuara në identitetet fetare,pasi shteti shqiptar pushoi së egzistuari dhe Shqipëria u bë shesh lufte.Ashtu si dhe në periudhën e para pavarësisë dhe tani çështja shtrohej për garantimin e pavarësisë së Shqipërisë prandaj identiteti fetar nuk luan ndonjë rol shkatërrues apo pengues.Aq më tepër që një pol i rëndësishëm i tërheqjes shpirtërore të shqiptarve myslimanë,perandoria turke ishte shkatërruar,po kështu ishte shkatrruar dhe dhe perandoria e Hasburgasve, poli tradicional mbështetës i katolikëve shqiptarë me politikën e vet të “Kulturprotectorat”,si dhe perandoria ruse një mbështetëse e fortë e ortodoksisë.Fuqitë lokale fqinje nuk mund të luanin më rolin e këtyre perandorive, ndaj identiteti fetar i shqiptarve tashmë hyn në një fazë të re,në atë të afirmimit dhe ndarjes së pushtetit në shtetin e ri, sesa forcimit të karakterit të vet shpirtëror dhe dallues.Delegacioni shqiptar në Konferencën e Paqes në Paris do ketë përfaqësues të tre besimeve,po kështu regjenca e parë që krijohet më 1921 kishte në përbërje të saj katër përfaqësues,të cilët përveç cilësive të tyre politike përfaqësonin dhe të katërt komunitetet fetare.Natyrisht që nuk mund të mungojnë dhe shpërthimet e identitetit fetar,siç është rasti i “vetshpalljes” së republikës së Mirditës më qershor1921, nga ana e prijsit katolik Marka Gjoni,i cili kërkonte “të krijonte një republikë të pavarur nën kujdesin e Jugosllavisë.Justifikimi i Gjonit për shkëputjen nga Shqipëria ishin prirjet “xhonturke” (korsivi është i origjinalit) të qeverisë së Tiranës dhe qëndrimi i saj armiqësor ndaj lirisë së katolikëve” (Austin,2003:57).Mirdita dhe fiset katolike po e kalonin tani ethet e forta të identitetit fetar që kish kaluar Shqipëria e mesme me lëvizjen e Haxhi Qamilit dhe një pjesë e Shqipërisë së jugut me lëvizjën “epiriotase” të Kristaq Zografos.Gjithsesi, në veprimin e Marka Gjonit kish më tepër një prapavijë politike sesa fetare.Si prijës i një krahine që historikisht ishte qeverisur tradicionalisht nga familja e vet,Marka Gjoni nuk mund të pranonte të ishte një qytetar i zakonshëm i shtetit të ri,ndaj thëriste në ndihmë identitetin fetar për të krijuar një identitet të ri shtetformues,natyrisht për të ruajtur pozitat e veta sunduese në krahinë.Akuzat e Marka Gjonit nuk ishin të vërteta pasi siç deklaroi anëtari i delegacionit shqiptar në Lidhjen e Kombeve në Gjenevë Mithat Frashëri , “qeveria e Tiranës nuk ishte qeveri muhamedane.Në kabinetin e saj kishte përfaqësues nga të gjitha fetë shqiptare.”(po aty:57),por ato arritën ta vinin në vështirësi delegacionin shqiptar i cili i duhej të përballej me faktin se brenda territorit të vet ishin dy qeveri dhe në këto kushte fuqitë e mëdha mund ta vononin njohjen diplomatike të Shqipërisë.Lëvizja nuk u mbështet as nga kleri katolik i Shkodrës duke zhvlerësuar në këtë mënyrë pretendimet e pa baza të Gjonit.
Prapavijat politike do të bëhen shprehëse të një lufte ppër pushtet,e cila kur nuk do të gjej argumenta bindëse për të mposhtur kundërshtarin do u kthehen identititeve fetare duke dhënë kambanën e alarmit se të drejtat e njërit grup po shkelen nga tjetri.Kështu grupet politike dhe partitë që do të rreshtohen në parlament,shpesh herë do të kenë ngjyra lokaliste,krahinore dhe i vetmi karakteristik e perbashkët do të jetë besimi fetar.Kështu blloku mysliman i çifligarve do të rreshtohej në Partinë Përparimtare, intelektualët ortodoksë në Partinë Popullore dhe intelektualët katolikë në grupin parlamentar të quajtur “Ora e Maleve”. Të gjitha këto grupe do të jenë shumë të ndjeshëm ndaj pushtetit politik dhe sidomos çështjes së tokës që përbënte një pikë kyçe në marrëdhëniet e barazisë qytetare.Shumica e çifligarve myslimanë nuk dëshironin që të bëhej një reformë agrare pasi pretendonin se toka ishte e trashëgueshme, ndërsa intelektualët ortodoksë dhe katolikë pretendonin se tokën çifligarët e kishin fituar si rezultat i privilegjeve që kishin pasur në perandorinë turke ndaj ajo duhej t’i nënshtrohej reformës agrare.
Në këtë kuadër nuk mënonin të ndizeshin dhe debatet të bazuara mbi identitetet fetare se kujt i përkiste toka dhe rrjedhimisht Shqipëria, atyre që kishin përqafuar Islamin dhe kishin bashkëpunuar me turqit apo atyre që kishin ruajtur besën e të parve dhe kishin vuajtur dhunën feudale për shekuj me rradhë?Debati do të vazhdonte të ishte i hapur përgjatë viteve 20’-24’dhe në një farë mënyre vazhdon të ketë spiralet e veta deri në ditët e sotme.Me rastin e debatit për identitetin Kadare-Qose, publicisti dhe piktori Maksi Velo do t’iu drejtohet “pasardhësve të atyre që u myslimanizuan”(Sulstarova,2007:9) se:

Për çfarë patriotizmi mund të flasin ata që tradhëtuan fenë e të parve dhe fenë e gjithë Ballkanit dhe ropës,Krishtërimin.Shqipërinë e ka sjellë në këtë gjendje (si vendi më i prapambetur dhe më i varfër),pikërisht kjo tradhti nga një pjesë e shqiptarve.Shqipërinë e solli në këtë gjendje Islami,që ishte një regres pashembullt.Jemi i vetmi popull në Evropë që kemi pasur një tragjedi të tillë.Të paktën tani pasardhësit e tradhëtarve të heshtin(Sulstarova, 2007:9).

Tone të tilla është vëshirë të gjesh në gjithë literaturën e hershme të rilindjes po dhe në atë të viteve 20’.Këtë lloj ligjërimi Noli do të mund ta cilesonte si një ilustrim të idesë së tij të anarkisë fetare të cilën e rradhiste në një nga pesë anarkitë që “pengonin intregimin kombëtar të shqiptarve”(Austin,2003:34).Noli kish qenë “veçanrisht gjithmonë i shqetsuar për ndikimin që do të kishin fetë e ndryshme ndaj bashkimit kombëtar.,duke vërejtur se bashkimi fetar kishte qenë shumë i rëndësishëm për kombet e tjerë të Ballkanit si grekët dhe serbët.Për të, për sa kohë qytetarët ortodoksë shqiptarë ishin nën kontrollin e Patriakanës greke dhe myslimanët nën ndikimin e Turqisë do të kishte pak progress”(po aty:34).Prandaj Noli do të vazhdonte punën e tij titanike të themelimit të Kishës Autoqefale Ortodokse shqiptare me një pasion të madh duke u shkëputur dhe për një vit nga karriera politike,në mënyrë që në mos të realizohej dot bashkimi fetar për shkak të egzistencës së tre feve të ndryshme,të paktën shqiptarët të kishin institucionet e tyre të pavarura fetare.Në të njëjtën rrugë do të ecte dhe komuniteti mysliman shqiptar i cili do kërkonte që të ishte i pavarur nga Stambolli,ndërsa bektashinjtë për shkak të përndjekeve në Turqi e patën më të lehtë për të siguruar pavarësinë nga teqeja e tyre mëmë .Të gjitha këto hapa, shprehnin një emancipim të elitës shqiptare e cila e shoqëruar dhe me tolerancën tradicionale fetare të shqiptarve, krijonin premisa për egzistencën dhe mbijetesën e shtetit të ri.Reformat për përftimin e institicioneve fetare të pavarura vazhduan dhe gjatë qeverisjes së mbretërisë,ku në përgjithsi u ruajt formula tashmë tradicionale e pjesmarrjes së të krishterve në kabinetet ministrore, madje dy kryeminstra ishin të tillë, Pandeli Evangjeli dhe Koço Kota.Reformat e ndërmarra më 1928, për ndalimin e ferexhesë, përshëndetjes islamike me dorë në zemër etj nuk shkaktuan ndonjë oponencë të madhe nga ana e popullsisë dhe ishte prova e parë se shteti mund të ndërhynte për të dhënë shoqërisë dhe fesë një fytyrë më moderne.
Gjithsesi pati pakënaqësira në rradhët e klerit mysliman dhe besimtarve të devotshëm siç tregon rasti i shpërnguljes nga Shkodra për në Siri i familjes të Muhammad Nasiruddin al-Albani, një nga dijetarët e Islamit me origjinë shqiptare,si rezultat i këtyre reformave.(Wikipedia).Një efekt mbështetës në këtë drejtim ishin dhe reformat e ndërmarra nga Ataturku në Turqi, reforma të cilat synonin modernizim dhe prosperitet të shoqërisë .Në këtë kuadër,mbështetja tradicionale që mund të vinte nga Turqia ishte e dobët dhe identitetet fetare shqiptare filluan të shikojnë përpara për të bërë të tyre reformimin dhe modernizmin.

IV
Analiza tradicionale të marrëdhënive midis shteteve dhe besimeve fetare tregojnë se ka tre modele të tilla. “Modeli i parë është sistemi i bazuar në marreveshje midis shtetit dhe besimeve fetare,modeli i dytë është sistemi i karakterizuar nga egzistenca e kishës shtetërore apo nacionale dhe sistemi i tretë,i cili ka një një ndarje të qartë midis shtetit dhe besimeve fetare.”(Sinani, 2007:15).Modeli i tretë i cili quhet dhe secularist apo laik dhe është modeli të cilin ka marrë për bazë shteti shqiptar për të ndërtuar marrëdhëniet e veta me komunitetet fetare.A është kjo zgjedhje, një prirje moderniste e shqiptarve apo është një zgjedhje e detyruar për shkak të identiteve të ndryshëm fetarë që është e përbërë Shqipëria? Natyrisht përgjigjie nuk mund të jepet lehtë ,veçanrisht nëse krahason aspekte të tjera të jetës dhe kulturës sonë për të parë nëse ato kanë qenë kaq moderne sa prirja e shqiptarve përkundrejt besimit fetar në këto 85 vjet të shteti të stabilizuar shqiptar.Por edhe në qoftë se nuk është kështu,do me thënë zgjedhja në fillimet e viteve 20’ ka qenë e imponuar për shkak të realiteteve fetare, askush nuk mund ta mohojë sot prirjen moderniste të identitetit fetar të shqiptarve.Kjo prirje është e lidhur shumë e ngushtë dhe me identitetin kombëtar kaq të përfolur në ditët tona, aq sa shpesh herë duket se në debatin Lindje-Perëndim do të përcaktohet dhe vendi i shqiptarve në hemisferë sipas besimit të tyre fetar.Kjo lloj përqasje mendoj se është e gabuar sepse të kërkosh ti përshtatesh mjedisit(do me thënë Evropës ku jetojmë) do të thotë që ta konsiderosh veten një “patate të Lisenkos”,e cila rritet dhe fryhet por humbet shijen e vetë origjinale.Ka një farë afiksacioni të shqiptarve në ditët e sotme me pragmatizmin e skajshëm të “evropianizimit” të jetesës së tyre , ku dhe identiteti fetar tashmë i paracaktuar sipas disave, përderisa rrojmë në Evropë duhet të ketë një tendence kristianizmi ose në qoftë se jo e tillë , të “paktën semi-kristian” siç e përcaktonte Konica në prag të shpalljes së pavarësisë.S’ka asnjë gjë të keqe nëse në momente të caktuara individë apo grupe njerëzish vendosin të përqafojnë një identitet tjetër fetar nga ai i mëparshmi apo ai i prindërve të tyre, aq më tepër që kjo “është e garantuar nga Karta e të Drejtave Themelore, artikulli 10” (Sinani, 2007:16), por kur kjo tendencë shkon dhe në përqafimin e një identiteti kombëtar tjetër atëherë këtu çalon diçka dhe duhet të fillojmë të dyshojmë nëse zgjedhja është bërë sipas kërkesës shpirtërore të pa përmbushur nga besimi i mëparshëm apo thjesht pragmatizëm në përftimin e një statusi të qytetarit të hemisferës perëndimore? Me hemisferë perëndimore nënkuptoj Perëndimin me të tërë zhvillimin e tij social, historik kulturor, përkundrejt Lindjes të përfaqësuar nga hemisfera lindore. “Për evropianët “ sipas Saidit “e para është quajtur “bota jonë” (korsivi është i origjinalit), kurse e dyta “tjetri” (korsivi është i origjinalit) negativ i saj”(Sulstarova, 2007:1).Shqiptarët kanë patur fatin historik (mirë apo për keq, kjo mbetet ende një pyetje e hapur) tu përkasin të dyjave influencave dhe të jenë vendi ku të dyja botët janë ndeshur ashpër.Vetëm 95 vjet më parë territori ynë konsiderohej Lindja e Afërme dhe ishim pjesë e një perandorie që shtrihej nga Eufrati deri në Ballkan , kurse 95 vjet më vonë territoret tona quhen Ballkani Perëndimor dhe jemi gati të hyjmë në njësinë më të përparuar përsa i përket sot zhvillimit kulturor,social dhe ekonomik -Bashkimin Evropian. A do të marrim me vete ndonjë gjë nga të qënit tonë si ex-Near Easters apo do hyjmë si present-Balcan Westers, që është afër për të mos thënë më mirë pro-european life style. Përgjigjen mund ta kërkojmë ta gjejmë në diasporat shqiptare në Evropë të cilat janë integruar më shpejt sesa popullsia në Shqipëri në tërësinë administrativo-ekonomikë ku ne aspirojmë të hyjmë.Fatkeqësisht, vihet re një ri-gjallërim i identitetit fetar disa herë të trashëguar disa herë të fituar në vendin pritës, dhe që shpesh herë është i shoqëruar dhe me përqafim të një identiteti tjetër kombëtar.Jemi ndoshta nga të paktat shtete në Evropë që mund të kemi probleme të vetdijes kombëtare dhe të “kacafytjes” nacionaliste për të bindur njerëz tanë,bashkëatdhetarë se na përkasin “neve” dhe jo “të tjerve”.Në fakt fenomeni nuk është i ri,pasi në asnjë komb tjetër në Evropë nuk gjendet shprehja “gjaku yne i shprishur”.Për shekuj me rradhë shqiptarët furnizuan repartet drithëruese të jeniçerve dhe shpesh herë qindra nga ata bënë një karrierë të shkëlqyer me një identitet të ri fetar dhe identitet të ri kombëtar,por çështja shtohet nëse gabuam njëherë në mugullirat tona të historisë kur nuk ishim të ndërgjegjshëm si komb a duhet të gabojmë tani sërish në prag të festimit të njëqindvjetorit të pavarësisë? Duke qenë njëherë viktima të një inxhinirie sociale që na shkatrroi rëndë sepse kthimi jonë nga Njeriu i Ri i socializmit real në homosapiensin normal u shoqërua me trauma ,efektet e të cilave i shikojmë përditë në rreth e rrotull,do të jetë shumë e vështirë që të stisim apo të marrim hua një identitet tjetër.Nëse egzistenca dhe mbijetesa e shtetit shqiptar të vitit 1913’ ka pushuar së qeni një eksperiment socilologjik,dhe është tashmë një realitet atëherë suksesin nuk duhet ta shikojmë në tipin e këshillave koniciane për të përqasur identitete,por në diversitetin e këtyre identiteteve.Shoqëria e sotme shqiptare pas një rrugëtimi të gjatë të integrimit të kulturave ,si rezultat i identiteve të ndryshme fetare është çka Evropa ka propaganduar dhe kërkuar të jetë shoqëria e saj në të ardhmen.Krisma e armës që vrau arkidukën Ferdinant në Sarajevë më 1914, prishi përgjithmonë dhe Bosnjën idilike të Ivo Andricit dhe statukuo-n fallco të harmonisë midis identiteve fetare që se ndjenin veten një komb.Fatmirësisht shqiptarët kanë zgjedhur që të ndihen si komb dhe pastaj të identifikohen si identitete fetare dhe kjo prirje moderniste e tyre ka treguar se ka qenë zgjedhja më e mirë që kanë bërë ndonjëherë.Përgjigjia proverbiale e poetit kombëtar të shqiptarve patër Gjergj Fishtës,kur një diplomat francez e pyeti sesi ka mundësi që të besosh në mbijetesën e një shteti të tillë me tre besime?,ishte:“po është e vertetë zotëri se kemi tre besime, por ne nuk kemi pasur ndonjëherë Natë Shën Bartolemeu”,vazhdon të mbetet sfiduese edhe për kombe dhe shtete shumë më të zhvilluara sesa Shqipëria.

V
Identiteti fetar dhe bashkimi fetar ka qenë një nga qelizat më të forta të shoqërive,që kanë aspiruar dhe janë krijuar si kombe.Në vende të ndryshme këto tipare vazhdojnë ende të jenë përcaktues për zgjedhje të ndryshme apo hartimin e politikave të ndryshme.Në Shqipëri për shkak të egzistencës së tre besimev fetare,identiteti fetar u mënjanua nga zgjimi nacionalist i tyre,duke ia lënë rrugën kulturës dhe gjuhës kombëtare.Në periudha të ndryshme identiteti fetar influencoi në zgjedhje lokaliste por ai s’arriti dot që të pengonte procese integruese,falë të cilave shqiptarët u themeluan si komb dhe në të njëjtën kohë u bënë pararendës të një sistemi vlerash aq të dëshirueshëm sot në Evropë.Prirjet moderniste të shqiptarve, duhet ti qëndrojnë zgjimit të tyre nacionalist,duke u munduar për të nxjerrë vlerat më të mira të tyre dhe jo të imitojnë apo krijojnë identitete të rremë.Integrimi në familjen evropiane,nuk do të thotë detyrimisht pragmatism por para së gjithash është integrim vlerash dhe në këtë kontekst ,shqiptarët kanë se ç’afrojnë nga historia e tyre e gjatë e formimit si komb.
______________________________
Burimet:
Austin,C.Robert.(2003).Shtegu i Pashkelur i Fan Nolit.Tiranë: Albin
Islami, M.(1977).Naum Bredhi-Veqilharxhi.Tiranë:8 Nëntori
Mema, Sh.(1988).Shqipëria dhe shqiptarët në veprat e udhëtarve anglezë.Tiranë:8 Nëntori
Peçi,A.(2006) Kisha-xhami: “Dilema e madhe e Rozafës”. Internet: http://www.tokashqiptare.com/kultura/10.htm
Salleo,F.(2000).Shqipëria:gjashtë muaj mbretëri.Tiranë: Shtëpia e Librit dhe Komunikimit.
Sinani,GJ.(2007). “European model of relations between state and religion”.The National Interest, 1:15
Skëndi. S(2000). Zgjimi Kombëtar Shqiptar.Tiranë:Phoenix
Sulstarova E.(2007).”Orientalizmi shqiptar dhe debati mbi identitetin”Vlorë:Universiteti Veror
Wikipedia:2006,Internet:http://en.wikipedia.org/wiki/Muhammad_Nasiruddin_al-Albani.

---------

• TITUJ TË NGJASHËM

[ Histori ]

HASAN PRISHTINA (2008-08-07 14:09:44 nga admin1)

[ Opinione ]

Zannieri jashtë Kosovës! (2008-08-07 13:53:02 nga admin1)

[ Opinione ]

E KENI PËRGJEGJËSINË, JEPNI DORËHEQJE ZOTI JAGXHILLAR! (2008-08-07 13:46:25 nga admin1)

[ Opinione ]

“Ne dhe Ata” apo vënia e vijave të kuqe (2008-08-07 13:43:53 nga admin1)

[ Lajmet kryesore ]

KS ndahet në qëndrimet mbi dhunën e marsit (2008-08-07 13:10:57 nga admin1)