MISIONI NGA BE: MISION DERRASH :: DERVINA.COM

Arkivi i lajmeve
Për vitet 2006,2007 dhe 2008

^ Kategoritë

Kërko në lajme:

Shpalos kategorinë:

•	Lajmet kryesore

•	Lajmet në gjuhen angleze

•

Opinion

•	Intervista

•

Sport

•

Kultura

•

Histori

•

Diaspora

•

Tech-Info

Madhësia e shkronjave

Dukja	Madhësia (piksel)
AaBbCc	11 piksel
AaBbCc	12 piksel
AaBbCc	13 piksel
AaBbCc	14 piksel

Vizitorët online në arkiv: vizitorë

» MISIONI NGA BE: MISION DERRASH

Postuar më datën: 2008-01-05 08:51:36 nga admin1 :: Kategoria: Opinione

» Opcionet për artikullin

	Bëj favorit këtë artikull
	Pritoje këtë artikull
	Dërgo tek shoku/shoqja
	Shto koment këtë artikull

Me këtë mision europian, Kosova integrohet në BE atëherë kur shelgu do të bëj rrush. Pikërisht, misioni europian në Kosovë është pamundësim flagrant i integrimit drejt BE - së. Ky mision pamundëson integrimin mbarëkombëtar të shqiptarëve e lëre më atë drejt BE - së. Zatën, ky bashkim europian e ka përcaktuar qysh moti se s’do të pranojë asnjë vend në familjen europiane. Si ‘kompensim’ për këtë padrejtësi, BE - ja ka zgjedhur rrugën e nxjerrjes nga llamba të xhindit të quajtur Jugosllavi, pra themelimin e një Jugosllavie +-.

Shkruan: Salih MEHMETI

Gogoli i përjashtimit

Siç alarmonin ca më herët të 14’të komandaturat e Ishingerit, misioni i ardhshëm europian pritet të zbarkojë kah fundi i kallnorit të 2008’ës. Deri më tani ky mision ka pasur një paramision i cili është marrë me sheshimin e parakushteve për një rehati sa më të mirë të misionit. Dy caqe mëtonte të arrinte ky paramision: e para të tokëzonte sa më thellë themelet e tij pa rënë në sy fort boshllëku gjatë zëvëndësimit të samarit të vjetër (UNMIK) me këtë të riun (EUMIK); dhe së dyti të fillonte me distribuimin e listave me persona të “papërshtatshëm” politik që d.m.th. qartësisht se ky mision do të jetë po aq, në mos më shumë drakonik sesa regjimi pararendës. Pohimin e sipërthënë e bënë të bindshëm edhe më tej, vazhdimi i segregacionit politik ndaj Albin Kurtit (burgosja e tij është zëvendësuar me njëfarë syrgjynimi të heshtur duke e lënë rastin e tij të hapur) dhe një numri të madh të luftëtarëve të UÇK - së.
Zatën, për këso deprivimesh BE - ja ka një traditë të dëshmuar: sa kundërshtarë politik gjendën pa din e nishan të privuar nga liria në shumë vende aderante të BE - së. Kujtoni kësodore aktivistë skocezë a irlandezë dhe fatin e tyre dhe do të kuptoni si luhet vallja. Rrethanshmëria politike e tanishme po bëhet kusht i mjaftë sa për ta përjetësuar BE - ja qëndrimin e saj të pandërgjegjshëm ndër ne. Këtë gjendje përjetësie BE - ja e ka në dorë, pikërisht pse shqiptarët i ka futur midis çekanit dhe kudhrës. Asnjë agjens institucional s’do guxojë as të pipëtijë sepse kategoria e përjashtimit do të jetë një gogol i llahtartë. Nëse UNMIK - u më parë kurbanizonte zakonisht vendorët nga disa ofiqe më të larta (kuptohet se nuk i prishnin punë), EUMIK - u do t’i bëjë kurbanizmet te ata me ofiqe më të ulëta, sepse ai llogarit se prushi i nxehtë ka mbetur poshtë.
Kësilloj, mos të çuditemi kur një komandant, toger a pjesëtar i thjeshtë i FSK - së së ciflosur do të gjendet të të shumtit (e kam fjalën për të gjithë ata të ‘papërshtatshmit’ politik që janë suprimuar deri më tani).

Kështjellë prej letre

Në komunën e Leposaviqit, PDK - ja krekosej pse fitoi sipërisht kokrra politike më shumë se të tjerët. Por, Rykeri me fuqinë e tij perandorake sakaq e rrëzoi këtë kështjellë prej letre të PDK - së duke e rilegalizuar pushtetin serb atje. Sikur PDK - ja të kishte mend në kokë dhe një fije ndërgjegjje politike, ajo do të duhej të ngrinte zërin lart për të mbrojtur ato pak fshatra të humbura shqiptare të mbetura në Leposaviq e Zveçan (Bistricë e Shalës, Koshtovë, Cerajë, Boletin, Lipë, Zhazhë, Vidimriq, etj). Por nuk gajlohet fort për këtë Hashim Thaçi i rrasur me të dyja këmbët në këpucën kryeministrore.
Derisa në Vidimriq, fshat shqiptar zbresin shpeshherë çeta paramilitarësh serb të cilët terrorizojnë shqiptarët, Hashimi shikon orën se mos është vonuar, në automobilin e koracuar që tarahytet poshtë e përpjetë për ‘kordinim me miqtë’!
E domethënien e kësaj epoke ‘kordinimesh’ na e zbërthen deklarata e të parit të diplomacisë allamane Frank Valter - Shtajnmajer i cili tha se BE - ja do t’u thotë shqiptarëve që kurrsesi nuk bën ta vetëshpallin pavarësinë.
Vitin e kaluar, komisioneri për zgjerim të BE - së Oli Rehn - i ia pat tërhequr vërejtjen udhëheqësve të Bosnjës se treni po i ikën Bosnjës pakthyeshëm në mbetjen pa nënshkrim të marrëveshjes për asocim - stabilizim.
Në anën tjetër, ministri i jashtëm boshnjak Sven Alkalaj qahej se Forca policore e Republikës së Bosnjës nuk po i shtrin dorën e bashkëpunimit policisë federale. Këtu të ngre krupën kjo loja dhelpërake europiane: në njërën anë të thyejnë këmbët, në anën tjetër të thonë pse nuk vrapon?
Me keq sa kaq në Kosovë, nën petkun e SHPK - së paramilitarët serb do të gjëllijnë lirshëm në hapësirat e Kosovës. Ndërkaq or’e çast edhe ato pak baza që kishte SHPK - ja me policë shqiptar në veri të Mitrovicës, kanë filluar t’i sprapsin për në jug të qytetit.
Shtypi spekulativ në Kosovë ngrinte fishekzjarre mbi vendosjen e disa njësive amerikane në veri të Kosovës. Mos të mashtrohemi: baza të vockla amerikane ka pasur edhe më herët, por dihet mirëfilli sesa sasia e strukturave paralele të Serbisë ka lulëzuar në zenith gjatë tërë kësaj kohe. Ndoshta, kësaj rradhe do të ketë veçse lëvizje të bazave në ulëse të tjera por brenda të njejtës sallë, për ta ekzagjeruar këtë si një ‘ndërmarrje e denjë ndërkombëtare për të ndaluar ndarjen e Kosovës’!!!

Paja e përgjakshme

Numri tejet i madh i garnizioneve të gjindarmërisë që do të vijë si ‘pajë’ e BE - së në Kosovë sinjalizon se vendimi statusor do të jetë apokaliptik për shqiptarët. E këtë vendim mizor ata do ta mbrojnë me ligjin e xhunglës dhe gjyqin e më të fortit. Shto kësaj hataje edhe prepotencën e pafre gjithnjë të gatshme të SHPK - së dhe do të keni një përfytyrim të qartë mbi Kosovën e bërë gërmadhë: ky regjim policor europian i përforcuar përsosurisht nga qeveritë europiane do të përçapet që ta racionalizojë kofederatën e detyruar dhe të pabarabartë mes Serbisë ofansive dhe Kosovës së mundur nga dinosauri politik - juridik i komunave serbe.
Koncepti im për policin europian është kësisoj: dy këmbë, dy duar që mbajnë çyfte për gjueti njerëzish (si ‘shootgan’ ët e përdorur nga policia e UN - it kundër popullit me 10 shkurt) që iu bindën pajada komandamenteve të misionit europian.
Kurse, këta policët gjyhnaçarë të SHPK - së të qojnë mallin e Lefter Lefterit në romanin kolosal ‘Komisari Memo’ të Dritëro Agollit. Të gjitha survejimet, spiunimet dhe intervenimet e brendshme do të kryhen nga ky ‘Lefter Lefteri’ ynë. Druaj se do ta ketë fatin e njejtë...
Këtë vendim euro - imperial e kullufitën si gjithnjë këta çapaçulët e juntës negociatore, madje kësi hovi botërisht para Këshillit të Sigurimit. Kur farkëtoheshin instruksione dhe projeksione në atelieun e OKB - së, asnjëherë asnjeri nuk u pat honepsur nga Kosova. Tani, e lanë Fatmirin të llap gjoja lirisht. Ose ndryshe: i dëgjuan fjalët e tyre nga goja e papagallit nga Kosova. Po e lejojnë të flasë pra për të paktën nja dy arsyeje. Arsyeja e parë: vendimi është marrë qysh moti. Edhe sikur ta kishe të ‘drejtën historike të fjalës’ puna do të qe pisk, sidomos kur nuk ke fare ndenjëse në OKB. Arsyeja e dytë është se duan t’i japin një ngjyrë shqipe këtij vendimi kundërshqiptar. Fatmir Sejdiu dhe çapaçulët e juntës negociatore janë kozmopolitë të pandreçshëm. Merreni me mend: ata dinë më shumë se tetë gjuhë por në asnjërën prej tyre nuk dinë të thonë: JO.

Fundi homerik dhe disa emra kozmopolit

Ky mision ndonëse kuantitativisht do të jetë më pak i vëllimshëm se sa UNMIK- u, nuk do të thotë se do të jetë më i mangët sesa pararendësi. Madje do të ketë privilegje suplementare në të ashtuquajturën doktrinë famëkeqe të përjashtimit. Vëllimin e vogël të këtij misioni, kasta politike në vend po e shfrytëzon që ta sajojë një mirazh i cili e paraqet Kosovën të ‘lënë krejtësisht në duart e vendorëve’!!!
Ua shtjelloj këtë metaforikisht: Nëse në një klasë nxënsish dikush e përhap lajmin e rremë se mungon mësuesi, atëherë turma e mashtruar e nxënësve sikur çlirohet nga prangat e detyrimit, merr arratinë ose dalldiset fare. Secili prej tyre përjeton një ngazëllim naiv të harrimit të trysnisë që dikton prania e mësuesit duke e ndjerë veten përkohësisht zot të momentit. Gjithçka tjetër kthehet në zhgënjim në momentin kur merret vesh se mësuesi qenka në shkollë. Megjithatë, akoma nxënësit ndodhen të mpirë nga ekstaza që përjetuan ca çaste më parë.
Paj kujt s’i kujtohet ky pozicion qesharak që na ka përlyer sa e sa herë, p.sh. pak pas publikimit të Pakos së Ahtisaarit u pat tundur flamuri i rekomandimit të ‘pavarësisë së mbikëqyrur’. Dhe njerëzia atëherë u patën harpallisur aq fort sa mendonin të organizonin festa gjithëpopullore me valle e këngë, mish qengji e verë Rahoveci dhe gjithçka tjetër nga ‘menyja’ testamentale e Ibrahim Rugovës. Plot njerëz prireshin t’i pagëzonin fëmijët me emrin Ahtisar për ta pasur nën inicialet private ‘triumfin e madh’. Kjo pak a shumë është një ogur i zi si lajmim për ardhmërinë e breznive të reja: ata as që do të pyeten për asgjë si viktima të pa faj të baballarëve kompromisaxhi. Tani frikohem shumë se mos po i pagëzojnë fëmijët me emrin e suedezit Karl Bildt, i cili po përgatitka një ferman për ‘pavarësi’ me patronimin 1244!
Prandaj, bashkësia ndërkombëtare dhe kasta politike vendore po e cysin një atmosferë dalldie në mesin e shqiptarëve të ‘triumfit të madh’. Është bërë i njohur tanimë yrneku i huaj për të cytur shqiptarët për kompromise. Cili është ky yrnek? Paj, veçse e përmendëm, shqiptarët i entuziasmojnë në kulm. Në rrogoz të këtij entuziasmimi ndodhin kompromiset më të pabesueshme. Kujtojeni pak Albert Rohan - in kur thosh se kur po ua përmendim shqiptarëve fjalën pavarësi, negociatat po shkojnë më mbarë...
Këtu një zë s’po më lë të vazhdoj më tutje. A thua kush është? Është Homeri, aedi i madh i lashtësisë. Me këshillon urtësisht që të marr nga rafti i librave epin ‘Iliada’ dhe të gjej këngët e pararrafshimit të Trojës. Eurekaa! Troja u rrafshua për toke nga Kali i Trojës, pikërisht në çastin kur trojanët mendonin se ishin fitimtar! Dhe pastaj përfundimi tragjik dihet...
Ky ‘Kalë Troje’ do të bëjë zarare pa mbulesë që do të mbesin si cene të përjetshme. Mbyllja e portave ndaj këtij përbindëshi bëhët vetëm nëse populli ngjesh rradhët e demonstratave të mëdha me efekt trysnie për zënien e UNMIK - ut, ashtu siç zihet miu në dhokan. Dikush ndoshta nga lexuesit e mi të nderuar do të vrenjtej në çehre dhe do më pyeste me hakërrim: ‘Pse të ngritemi kundër UNMIK - ut, tash kur ai po shkon’?
Dhe atij lexuesi i përgjigjem kështu: Sepse nëse shkon UNMIK - u në këso gjendje vjen menjëherë mysafiri tjetër i paftuar EUMIK. Nëse UNMIK - un e zëmë në dhokan si miun, pra e paralizojmë paqësisht, atëherë me anë të ultimatumit demokratik do ta caktonim datën e mbajtjes së një plebishiti ku populli do të deklarohej për një Kosovë të mëvetësishme me suvernitetin e popullit. Kësodore, lamtumirë misione neokoloniale!
Misioni europian do të sprapsej pa hedhur asnjë çap përpara. Një udhë e dy punë, një udhë për një ardhmëri në diellin e lirisë dhe bashkimit kombëtar!
Ka njerëz të squlltë mendërisht që thonë se misioni i BE - së në Kosovë është hap drejt integrimit në BE!
Me këtë mision europian, Kosova integrohet në BE atëherë kur shelgu do të bëj rrush. Pikërisht , misioni europian në Kosovë është pamundësim flagrant i integrimit drejt BE - së. Ky mision pamundëson integrimin mbarëkombëtar të shqiptarëve e lëre më atë drejt BE - së. Zatën, ky bashkim europian e ka përcaktuar qysh moti se s’do të pranojë asnjë vend në familjen europiane. Si ‘kompensim’ për këtë padrejtësi, BE - ja ka zgjedhur rrugën e nxjerrjes nga llamba të xhindit të quajtur Jugosllavi, pra themelimin e një Jugosllavie +- (plus Shqipërinë, pa Slloveninë) e sheqerosur me ndonjë term të avancuar si kinse një mini BE në Ballkan! Fjala kryesore aty do t’i lihet Serbisë dhe dinastive politike postmillosheviqiane.
Mund të ketë ky mision anglezë, gjermanë, francezë, italianë, spanjollë, etj.etj por ata po vinë këtu me rrugën e pandershmërisë. Dritëro Agolli ka thënë diku: ‘...Derrat janë të ndryshëm por një feçkë kanë’.
Madje, një mik im i vyer e parodizonte kësisoj misionin europian: ‘Ujku i kullufiti delet në vathë, pse u maskua si tebdil duke u ngjyer me miell të bardhë si ngjyra e deleve. Por, prapë ai mbetet ujk delëngrënësi.
Urdhëro e shkundja miellin (demaskoje) këtij misioni; do të gjeni aty një ujk që lëshon jargë nga goja e tij gjakatare (Serbia).

Prishtinë, dhjetor 2007

---------

• TITUJ TË NGJASHËM

[ Histori ]

ABDYL KRASNIQI- FRYMËZUES BREZASH (2008-09-06 16:03:56 nga admin1)

[ Lajmet kryesore ]

Shqipëri-Suedi 0:0 (2008-09-06 14:27:21 nga admin4)

[ Opinione ]

NACIONALIZMI CINIK (2008-09-06 14:25:47 nga admin4)

[ Kultura ]

Tregim: TRUNGU I SHARTUAR (2008-09-06 08:44:32 nga admin4)

[ Opinione ]

Kujt i flet Qeveria kur thotë se nuk e ka ndërmend të ndërhyjë me dhunë në veri? (2008-09-06 07:42:11 nga admin4)